Lo spétacllo Lo bouque son-e 2025 propouze eun bosquet de tsansón é de mezeuque tradichonelle d’eun coutì é de l’atro di-z-Alpe, grase i travaill de retsertse que dèi sacante-z-àn l’an fé é fan le Trouveur Valdotèn pe la partia valdoténa é La Kinkerne pe salla savoyarda. Pe seutta occajón, le dou groupe se beutton eunsemblo pe eun conser bâtì esprés pe si momàn : l’è la mezeucca de la Fèira ! Vioule di borgno, cornemuze, flutte, violeun, contrebassa é demitón eunterpretton, atò de-z-arandzemèn orijinal, le pi dzen z-er de montagne é accompagnon le tsansón eun patoué é eun fransé pe an souaré totta dedeun la tradichón muzicala de inque.
L’eunsemblo di Violons Volants que dèi pi de djé-z-àn se dédie a troué, a moutré, a repropouzé lo répertouéo di violeun populéro eun Val d’Outa, dirijà pe Rémy Boniface, saré l’eunvitó spéchal de seutta véillà.